ബ്ലൂറേ തരംഗത്തിൽ നമുക്കും പങ്കുചേരാം

വിപണിയിലെ മാറ്റങ്ങൾ ഏതാണ്ട് ചാൾസ് ഡാർവിന്റെ പരിണാമ സിദ്ധാന്തം പോലെയാണ്. കാലഘട്ടത്തിനനുസരിച്ച് പുതിയ പുതിയ ഉപകരണങ്ങൾ രൂപംകൊള്ളുകയും, ചിലതിനു രൂപമാറ്റം സംഭവിക്കുകയും, മത്സരിക്കാൻ ശേഷിയില്ലാത്തവ മരണപ്പെടുകയും ചെയ്യും. CD എന്ന പുതിയ മീഡിയം രൂപപ്പെട്ടപ്പോൾ പഴയ മാഗ്നെറ്റിക് ടേപ്പുകൾക്ക് പൂർണ്ണമാ‍യും വംശനാശം സംഭവിക്കുകയാണുണ്ടായത്. എന്നാ‍ൽ തുടർന്നു വന്ന DVD ക്ക് അത്രവേഗം CDയെ കീഴ്പെടുത്താൻ കഴിഞ്ഞില്ല. അതിനും ശേഷം DVDയുടെ അടുത്ത തലമുറയായി രണ്ട് സാങ്കേതിക വിദ്യകൾ ആ‍ണ് രൂപം കൊണ്ടത്. HD-DVDയും, ബ്ലൂറേയും. ഇതിൽ HD-DVD ഏതാണ്ട് ജനിക്കുന്നതിനും മുൻപേ മരണപ്പെട്ടു. ഇനി ഭാവിയുടെ സ്റ്റോറേജ് വിദ്യയായ ബ്ലൂറേ ആണെങ്കിൽ വിലകുടുതൽ കാരണം വളരെ പതുക്കയേ പ്രചാരത്തിൽ ആയി വരുന്നുള്ളു. HD ടിവികൾ പ്രചാരത്തിൽ ആകുമ്പോൾ തീർച്ചയായും അതിന്റെ കൂടെ ബ്ലൂറേയും പ്രചാരത്തിൽ ആകും. സാധാരണ ക്ലാരിറ്റിയിൽ ചിത്രങ്ങൾ കാണാൻ വേണ്ടി ആരും ഫുൾ HD ടിവി വാങ്ങി വയ്ക്കില്ലല്ലോ.

നിലവിൽ നമ്മുടെ ടിവി LCD/LED/പ്ലാസ്മ ഇങ്ങനെ ഏതുമാകട്ടെ, നമുക്ക് കിട്ടുന്ന മിക്കവാറും വീഡിയോ എല്ലാം 720p അഥവാ HD-റെഡി ആയിരിക്കും. അത് ഡിവിഡി ആയാലും, HD സാറ്റലൈറ്റ് റിസീവർ ആയാലും. അപ്പോൾ പിന്നെ ഫുൾ HD വീഡിയോ ലഭിക്കാൻ എന്താണ് മാർഗ്ഗം ? നിലവിൽ നമ്മുടെ നാട്ടിൽ കാര്യമായി പ്രചാരത്തിൽ ആയിട്ടില്ലെങ്കിലും ബ്ലൂറേ ഡിസ്കുകൾ ആണ് ഫുൾ HD വീഡിയോ ലഭിക്കാനുള്ള മാർഗ്ഗം. ഭാവിയിലെ ഉപയോഗം കൂടി കണക്കിലെടുക്കുകയാണെങ്കിൽ, അതായത് ഒരു HDടിവി വാങ്ങാൻ ഉദ്ദേശിക്കുന്നുണ്ടെങ്കിൽ ഒരു ഡിവിഡി പ്ലേയർ വാങ്ങുന്നതിനേക്കാൾ നല്ല്ലത് ഒരു ബ്ലൂറേ പ്ലേയറിനായി പണം മുടക്കുന്നതാണ്.

ബ്ലൂറേ സാങ്കേതിയ വിദ്യയുടെ ഉപജ്ഞാതാക്കളായ സോണി തന്നെയാണ് ബ്ലൂറേ പ്ലേയറുകളൂറ്റെയും, ഡിസ്കുകളുടെയും നിർമ്മാണത്തിൽ മുൻപിൽ നിൽകുന്നത്. നിലവിൽ വിപണിയിൽ ലഭ്യമായതിൽ എല്ലാ ഫീച്ചേഴ്സോടെയും കൂടിയ എന്നാൽ താങ്ങാവുന്ന വിലനിലവാരത്തോടു കൂടിയ ഒരു ബ്ലൂറേ പ്ലേയറാണ് BDP-S380. പഴയ സിഡി, ഡിവിഡി പ്ലേയറുകൾ കണ്ട് പരിചയിച്ച നിങ്ങൾ അത്തരത്തിൽ ഒരു പ്ലേയറായി ആധുനിക മീഡിയ പ്ലേയറുകളെ കാണരുത്, കാരണം അവയെല്ലാം തന്നെ വൈഫൈ ഇന്റർനെറ്റ് അടക്കമുള്ള സവിശേഷതകളുമായാണ് എത്തുന്നത്.

സോണി BDP-S380 ഫുൾ HD പിന്തുണക്കുന്ന ഒരു ബ്ലൂറേ മീഡിയാ പ്ലേയർ ആണ്. അതായത് ഇന്ന് ലഭമായതിൽ വച്ച് ഏറ്റവും മികച്ച ദൃശ്യാനുഭവം നിങ്ങളുടെ സ്വീകരണ മുറിയിൽ ലഭ്യമാക്കി തരാൻ ഇതിന് സാധിക്കും. ബ്ലൂറേ കൂടാതെ യുഎസ്ബി, ഹാർഡ് ഡിസ്ക്, ഇന്റർനെറ്റ് സൌകര്യങ്ങളും ഉണ്ട്. അതായത് ബ്ലൂറേ ഡിസ്ക് കൂടാതെ നിങ്ങളുടെ പെൻഡ്രൈവിലുള്ള വിവരങ്ങളൂം, ഇനി ഇവ ഹാർഡ് ഡിസ്കിൽ സൂക്ഷിച്ച് വച്ച് നിങ്ങളുടെ സമയം അനുസരിച്ചോ നിങ്ങൾക്ക് കാണാം. വൈഫൈ, ലാൻ എന്നിവ വഴി ഇന്റർനെറ്റ് കണക്ടിവിറ്റിയും ഇതിലുണ്ട്. ബ്രാവിയ ഇന്റെർനെറ്റ് വഴി ഓൺലൈൻ സ്ട്രീമിങ്ങ് വീഡിയോ തടസമില്ലാ‍തെ മികച്ച ക്ലാരിറ്റിയോടെ ഇതുവഴി നിങ്ങൾക്ക് കാണാം, പക്ഷേ നല്ല ഒരു ഇന്റർനെറ്റ് കണക്ഷൻ ഉണ്ടായിരിക്കണമെന്നു മാത്രം. യുട്യൂബ്, സ്റ്റൈൽ, സിങിങ്ങ് ഫൂൾ, ബ്ലിപ്പ് ടിവി, സോണി ടിവി എന്നിങ്ങനെ വിവിധ വെബ്സൈറ്റുകൾ ആക്സസ്സ് ചെയ്യാനും, വീഡിയോ ബ്രൌസ് ചെയ്യാനും സാധിക്കും. ഇത് നിങ്ങളൂടെ ടിവിയെ ഒരു സമ്പൂർണ്ണ വിനോദ മാധ്യമം ആക്കിത്തീർക്കുന്നു.



ഒരു യുഎസ്ബി പോർട്ട്, HDMI പോർട്ട്, കോയാക്സിയൽ പിൻ, കോമ്പോസിറ്റ് വീഡിയോ-ഓഡിയോ ഔട്ട് എന്നിവ കൂടാതെ ഇന്റർനെറ്റ് കണക്ടിവിറ്റിക്ക് ഒരു ഈതർനെറ്റ് പോർട്ടും ഉണ്ട്. ഏതായാലും ഒന്നിലധികം HDMI പോർട്ടുകൾ വളരെ അനിവാര്യമായ ആവശ്യമായിരുന്നു. ഉപയോഗിക്കുവാൻ വളരെ സൌകര്യപ്രദമായ ഒരു റിമോട്ട് കൺട്രോൾ ആ‍ണ് ഇതിന്റെ കൂടെ ലഭിക്കുന്നത്. ഇനി സോണിയുടെ മീഡിയ റിമോട്ട് മൊബൈൽ ആപ്ലിക്കേഷൻ വഴി ഐഫോണും, ആൻഡ്രോയിഡ് ഫോണും ഉപയോഗിച്ച് നിങ്ങൾക്ക് ഈ പ്ലേയർ നിയന്ത്രിക്കാം. വൈഫൈ വഴിയാണ് ഈ റിമോട്ട് നിയന്ത്രണം സാധ്യമാകുന്നത്.

സോണിയുടെ ഈ ബ്ലൂറേ പ്ലേയർ ഡോൾബി ട്രൂ-HD, DTS-HD എന്നീ ഹൈ ക്വാളിറ്റി ഓഡിയോ ഫോർമാറ്റുകളെ പിന്തുണക്കുന്നുണ്ട്. നിലവിൽ ഇവ ഉപയോഗത്തിൽ വന്നിട്ടില്ലെങ്കിലും മറ്റ് കമ്പനികളേക്കാൾ ഒരു പടി മുന്നിലെത്താൻ ഇത് സോണിയെ സഹായിച്ചിട്ടുണ്ട്. ഇതിന്റെ 7.1 ചാനൽ ഓഡിയോ ഔട്ട്പുട്ട് വളരെ മികച്ച അനുഭൂതിയാണ് പ്രദാനം ചെയ്യുന്നത്.

നിലവിൽ ഇത് ഒരു സമ്പൂർണ്ണ പ്ലേയർ ആണെന്നു പറയാൻ പറ്റില്ല. ഇതിന്റെ ഏറ്റവും വലിയ കുറവ് 3D പിന്തുണക്കാത്തതാണ്. ഒപ്പം തന്നെ Dvix ഫോർമാറ്റിന്റെ പിന്തുണക്കാത്തതും ഒരു പോരായമയായി ചൂണ്ടികാണിക്കാവുന്നതാണ്. ഇങ്ങനെയൊക്കെയാണെങ്കിലും ലോ ബഡ്ജറ്റിൽ ലഭിക്കുന്ന ഏറ്റവും മികച്ച ബ്ലൂറേ പ്ലേയറുകളിലൊന്നാ‍ണ് സോണി BDP-S380 എന്ന് ആത്യന്തികമായി വിലയിരുത്താം.

കടപ്പാട്‌:electropedia

വീഡിയോ പ്ലേ ചെയ്യുന്നില്ലെങ്കിൽ

ചോദ്യം : എനിക്ക് ഒരു സോണി ഹാൻഡിക്യാം ഉണ്ട്. അതിൽ എടുക്കുന്ന വീഡിയോ എന്റെ കമ്പ്യൂട്ടറിൽ പ്ലേ ചെയ്യുന്നില്ല. വീഡിയോ ഓപ്പൺ ചെയ്യുമ്പോൾ സിസ്റ്റം ഹാങ്ങ് ആയിപ്പോകുന്നു. എന്നാൽ സിഡിയോ, ഡിവിഡിയോ പ്ലേ ചെയ്യുന്നതിനു കുഴപ്പമൊന്നുമില്ല.



ഉത്തരം : വീഡിയോ പ്ലേ ചെയ്യാൻ ബുദ്ധിമുട്ട് ഉണ്ടാകുന്നത് സോഫ്റ്റ് വെയറിന്റെയോ, ഹാർഡ് വെയറിന്റേയോ തകരാർ കൊണ്ടായിരിക്കാം. അതായത് താങ്കളുടെ ഹാൻഡിക്യാം റെക്കോർഡ് ചെയ്യുന്ന ഫോർമാ‍റ്റിനെ പിന്തുണക്കാൻ താങ്കളുടെ മീഡിയാപ്ലേയർ/ മറ്റ് പ്ലേയറിനു സാധിക്കാത്തത്കൊണ്ട് ഇങ്ങനെ സംഭവിക്കാം. ഇതിനു പരിഹാരം കണ്ടെത്താൻ നിങ്ങളുടെ കമ്പ്യുട്ടർ ഇന്റർനെറ്റുമായി കണക്ട് ചെയ്തതിനുശേഷം വീഡിയോ ഓപ്പൺ ചെയ്യുക. മീഡിയാ പ്ലേയർ തനിയെ ആവശ്യമാ‍യ പ്ലഗ്ഗിനുകൾ ഇൻസ്റ്റാൾ ചെയ്തുകൊള്ളും. അതല്ലെങ്കിൽ vlc മീഡിയ പ്ലേയർ ഡൌൺലോഡ് ചെയ്ത് ഉപയോഗിച്ച് നോക്കുക.

താങ്കളുടെ വിവരണത്തിൽ നിന്നും തകരാർ മുക്കവാ‍റും ഹാർഡ് വെയറിന്റെ ആകാൻ സാധ്യതയുണ്ട്. അതായത് ഹാൻഡിക്യാം റെക്കോർഡ് ചെയ്യുന്ന HD വീഡിയോ കമ്പ്യൂട്ടർ പിന്തുണക്കാത്തതിനാ‍ലും ഈ തകരാർ സംഭവിക്കും. 5 വർഷത്തിലും കുടുതൽ പഴക്കമുള്ള കമ്പ്യൂട്ടറുകൾ HD വീഡിയോ പിന്തുണച്ചു എന്നു വരില്ല. ഇപ്പോൾ റെക്കോർഡ് ചെയ്യുന്നതിലും കുറഞ്ഞ റെസലൂഷ്യനിൽ അതായത് 720p യിൽ വീഡിയോ റെക്കോർഡ് ചെയ്ത് അത് നിങ്ങളുടെ കമ്പ്യൂട്ടറിൽ പ്ലേ ചെയ്യുന്നുണ്ടോ എന്ന് പരിശോധിക്കുക. പ്ലേ ചെയ്യുന്നെങ്കിൽ തകറാർ റെസലൂഷ്യൻ കൂടിയതിന്റെ ആണെന്ന് ഉറപ്പിക്കാം. ഇതിൻ പരിഹാരമായി ഒരു ഗ്രാഫിക്സ് കാർഡ് വാങ്ങി ഘടിപ്പിച്ചാ‍ൽ മതിയാകും. ഒരു 2000-3000 നിരക്കിൽ നല്ല ഗ്രാഫിക്സ് കാർഡ് ലഭിക്കും.

ഇനി പണച്ചിലവില്ലാത്ത ഒരു മാർഗ്ഗമാണു നിങ്ങൾ തേടുന്നതെങ്കിൽ താങ്കൾക്ക് കുറഞ്ഞ റെസലൂഷ്യനിൽ ചിത്രങ്ങൾ എടുക്കാം. 720p ഒരു മോശം റസലൂഷ്യൻ ആണെന്നു കരുതണ്ട. ഇപ്പോൾ നമ്മുടെ നാട്ടിൽ ലഭ്യമാകുന്ന എല്ലാ വീഡിയോയും (DVD, യു ട്യൂബ്, സാറ്റലൈറ്റ് റിസീവർ) 720p ആണ്. ഇനി നിങ്ങൾ മുൻപ് എടുത്ത ചിത്രങ്ങൾ കാണുന്നതിനായി ഫോർമാ‍റ്റ് ഫാക്ടറിയോ അതുപോലെ മറ്റേതെങ്കിലും വീഡിയോ കൺവെർട്ടറോ ഉപയോഗിച്ച് വീഡിയോ റെസലൂഷ്യൻ 720p ആയി കുറക്കുക.

കടപ്പാട്‌:electropedia

നോക്കിയ 41 MP ക്യാമറ ഫോൺ – സത്യവും മിഥ്യയും.

ബാർസലോണയിൽ നടന്ന വേൾഡ് മൊബൈൽ കോൺഫറൻസിൽ വച്ച് തങ്ങളുടെ 41 മെഗാപിക്സൽ ക്യാമറ പുറത്തിറക്കുക വഴി നോക്കിയ ലോകത്തെ തന്നെ ഞെട്ടിച്ചിരിക്കുകയാണ്. പ്രമുഖ ക്യാമറ നിർമ്മാതാക്കളായ സോണി, കാനോൺ, നികോൺ, ഫ്യൂജിഫിലിം എന്നിവരെല്ലാം 20 മെഗാപിക്സൽ ലോ‍കത്തു കിടന്നു കറങ്ങുമ്പോഴാണ് വെറുമൊരു മൊബൈൽ ഫോൺ നിർമ്മാതാക്കളായ നോക്കിയ 41 മെഗാപിക്സൽ പുറത്തിറക്കുന്നത്, അതും അവരുടെ ഒരു മൊബൈൽ ഫോണിൽ ഇന്റഗ്രേറ്റ് ചെയ്ത്. ഇതിന്റെ വിലയോ എകദേശം 30,000 രൂപ മാത്രം. ഒരു നല്ല 12 മെഗാപിക്സൽ എസ്.എൽ.ആർ ക്യാമറ പോലും ഈ വിലക്കു കിട്ടില്ല. ലോകം പിന്നെ ഞെട്ടാതിരിക്കുന്നതെങ്ങനെ? ഇതൊരു കൺസപ് റ്റ് മോഡലാണെങ്കിൽ പോട്ടെ എന്നു വക്കാം. കാരണം കുറച്ചു നാൾ അതിന്റെ പുറകെ നടന്നു മടുക്കുമ്പോൽ എല്ലാം മടക്കി, പൊടിയും തട്ടി തിരിച്ചു പൊയ്ക്കൊള്ളും എന്നു കരുതാം. എന്നാൽ ഇതു ഒരു കൺസപ് റ്റ് മോഡൽ അല്ല. അടുത്ത മാസം വിപണിയിൽ ഇറക്കാൻ പാകത്തിൽ കുറ്റവും കുറവുകളും തീർത്താണ് ഈ മോഡൽ അവതരിപ്പിച്ചിരിക്കുന്നത്.


ആദ്യം ഇതൊരു 41 മെഗാപിക്സൽ ക്യാമറ ആണോ എന്നുചോദിച്ചാൽ അതെ എന്നാണുത്തരം. എന്നാൽ ശരിക്കും ഇതൊരു 41 മെഗാപിക്സൽ ക്യാമറ ആണോ എന്നു ചോദിച്ചാ‍ൽ അല്ല എന്നു പറയേണ്ടി വരും. പിക്സൽ ബിന്നിങ്ങ് എന്ന ഒരു സാങ്കേതിക വിദ്യയാണ് നോക്കിയ ഇതിൽ ഉപയോഗപ്പെടുത്തിയിരിക്കുന്നത്. പ്യൂർ വ്യൂ(pure view) എന്നു നോക്കിയ പേരിട്ടിരിക്കുന്ന ഈ സാങ്കേതിക വിദ്യ ചിത്രത്തിൽ വരാവുന്ന പരമാവധി എല്ലാ കുറവുകളെയും (Noices and Distortion) ഇല്ലാതാക്കുന്നതിനു സഹായിക്കുന്നു. ഇതിലെ ഭൂരിഭാഗം രീതിലളിലും 8, 5 മെഗാപിക്സലുകളിലാണ് ഫോട്ടോ ശേഖരിക്കുന്നതു.

അപ്പോൾ പിന്നെ എങ്ങനെയാണ് ഇതൊരു 41 മെഗ പിക്സൽ ക്യാമറ ആകുന്നത്? ഇതിൽ ആദ്യം ഫോട്ടോ ശേഖരിക്കുന്നത് 41 മെഗാപിക്സൽ വലുപ്പത്തിൽ തന്നെയാണ്. തുടർന്നു നോക്കിയയുടെ ഒരു ഓവർ സാമ്പിളിങ് (over-sampling) അൽഗോരിതം ഉപയോഗിച്ച് 5 മെഗാ പിക്സലിലേക്ക് ചുരുക്കുന്നു. അതായതു 7 പിക്സലുകൽ പരിഗണിച്ച്, അവയുടെ വിലകൾ കൂടി ചേർത്തിട്ടാണ് പ്യൂർ വ്യൂ 1 പിക്സൽ നിർമ്മിക്കുന്നതു. ആയതിനാൽ അതീവ സൂക്ഷ്മതയുള്ളതും, മികച്ച നിറങ്ങൾ പ്രതിഭലിപ്പിക്കുന്നതും, ഒട്ടും തെറ്റില്ലാത്തതുമായ ചിത്രങ്ങളാണ് ഇതിൽ ലഭിക്കുന്നത്. സാധാരണ ഫോണുകളിൽ 2x സൂം ചെയ്യുമ്പോൾ വ്യക്തത ¼ ആയി കുറയുന്നു. എന്നാൽ ചിത്രത്തിന്റെ ഒരു സൂക്ഷ്മാംശം പോലും നഷ്ടമാകാതെ 4x സൂം ചെയ്യാൻ പ്യൂർ വ്യൂവിൽ സാധിക്കുന്നു. നോക്കിയ തങ്ങളുടെ എല്ലാ ഫോണുകളിലും ഇനി ഈ സാങ്കേതിക വിദ്യയായിരിക്കും ഉപയോഗിക്കുക എന്നു പ്രഖ്യാപിച്ചു കഴിഞ്ഞു.

ഫോട്ടോ എടുക്കുന്നതിൽ മാത്രമല്ല, വീഡിയോ എടുക്കുന്നതിലും ഈ മികവ് പ്രകടമാണ്. 1080p യിൽ 30ഫ്രെയിംസ് വീഡിയോ റെക്കോർഡ് ചെയ്യാൻ ഇതിൽ സാധിക്കും. ഇതേ ക്ലാരിറ്റിയിൽ 3x സൂമും, 720p യിൽ 6x സൂമും ഒട്ടും ക്ലാ‍രിറ്റി കുറയാതെ ചെയ്യുവാൻ സാധിക്കും.

ഇതുകൊണ്ടു ഇതു വെറുമൊരു ക്യാമറ ഫോൺ ആണെന്നു കരുതണ്ട, ഒരു സൂപ്പർ സ്മാർട്ട് ഫോൺ ആയാണ് നോക്കിയ 808 പുറത്തിറക്കിയിരിക്കുന്നത്. 4“സ്ക്രീൻ ഉള്ള ഇതിൽ 1.3 Ghz സിംഗിൾ കോർ പ്രൊസസ്സറും, 512 MB റാമും ആണ് ഉള്ളത്. 16 GB ഇൻബിൽറ്റ് മെമ്മറിയും ഇതിലുണ്ട്. പ്രോസസ്സർ, ഗ്രാഫിക്സ് പ്രോസസ്സർ എന്നിവയെ സംബന്ധിച്ച കൂടുതൽ വിവരങ്ങൾ നോക്കിയ പുറത്തു വിട്ടിട്ടില്ല. സിംബിയൻ ബെല്ല ആണു ഇതിലെ ഓപ്പറെറ്റിങ്ങ് സിസ്റ്റം. ഡോൾബി മൊബൈൽ പ്ലസ് എന്ന 5.1 സറൌണ്ട് സൌണ്ട് സിസ്റ്റവും ഇതിൽ ഉൽ‌പ്പെടുത്തിയിട്ടുണ്ടു. 1400 mAh ബാറ്ററി 7 മണിക്കൂർ സംസാര സമയം വാഗ്ദാനം ചെയ്യുന്നു.

സൂപ്പർ ഹൈ എൻഡ് കാറ്റഗറിയിൽ നോക്കിയക്ക് ശക്തനായ ഒരു പോരാളി ഇതു വരെ ഇല്ലായിരുന്നു. ആ പരാതിക്കാണ് ഇപ്പോൾ പരിഹാരം ആയിരിക്കുന്നത്. ഫോണിന്റെ കൂടുതൽ വിവരങ്ങൾക്കായി കുറച്ചുകൂടി നമുക്കു കാത്തിരിക്കാം.


കടപ്പാട്‌:electropedia

വിക്കിപീഡിയയില്‍ പരസ്യമുണ്ടെങ്കില്‍ നിങ്ങളുടെ കംപ്യൂട്ടറില്‍ വൈറസുണ്ട്‌

ലോകത്തിലെ ഏറ്റവും വലിയ സ്വതന്ത്ര ഓണ്‍ലൈന്‍ സര്‍വ്വവിജ്ഞാനകോശമാണ്‌ വിക്കിപീഡിയ. ഇക്കാലത്ത്‌ വിവരശേഖരണത്തിനായി ലോകമെമ്പാടുമുള്ള ലക്ഷകണക്കിന്‌ ആളുകള്‍ വിക്കിപീഡിയയെയാണ്‌ ഉപയോഗിക്കുന്നത്‌. നിങ്ങളുടെ കംപ്യൂട്ടറില്‍ നിന്ന്‌ വിക്കിപീഡിയയില്‍ പ്രവേശിക്കുമ്പോള്‍ ആ സൈറ്റില്‍ വാണിജ്യ പരസ്യങ്ങള്‍ കാണാറുണ്ടോ? എങ്കില്‍ ശ്രദ്ധിക്കുക, നിങ്ങളുടെ കംപ്യൂട്ടറില്‍ വൈറസ്‌ ബാധിച്ചിട്ടുണ്ട്‌.


വെബ്‌ ബ്രൗസറിനെ വൈറസ്‌ ബാധിക്കുന്നതുമൂലമാണ്‌ വിക്കിപീഡിയയില്‍ പരസ്യം ദൃശ്യമാകുന്നതെന്ന്‌ വിദഗ്‌ദ്ധര്‍ പറയുന്നു. വിക്കിപീഡിയയില്‍ ഒരിക്കലും പരസ്യം ഉപയോഗിക്കുന്നില്ലെന്ന്‌ വിക്കിപീഡിയ വ്യക്‌താവ്‌ അറിയിച്ചു. ഒരു മില്യണിലധികം ആളുകള്‍ മുപ്പത്‌ ഡോളര്‍ വീതം നല്‍കിയ സംഭാവന ഉപയോഗിച്ചാണ്‌ വിക്കിപീഡിയ പ്രവര്‍ത്തിക്കുന്നത്‌. അതിനാല്‍ ഞങ്ങള്‍ക്ക്‌ പരസ്യവരുമാനത്തിന്റെ ആവശ്യമില്ല- വിക്കി വ്യക്‌താവ്‌ പറഞ്ഞു. എന്നാല്‍ അടുത്തകാലത്തായി വിക്കി സൈറ്റുകളില്‍ പരസ്യം ദൃശ്യമാകുന്നതായി ചിലര്‍ അറിയിക്കാറുണ്ട്‌. ഇത്‌ വെബ്‌ ബ്രൗസറിനെ വൈറസ്‌ ബാധിച്ചതുമുലമാണെന്നും വിക്കി വ്യക്‌താവ്‌ അറിയിച്ചു. ഇങ്ങനെ പരസ്യം ദൃശ്യമാകുന്നുണ്ടെങ്കില്‍ കംപ്യൂട്ടറിന്റെ മെമ്മറിയെയും ഹാര്‍ഡ്‌ ഡിസ്‌ക്കിനെയും വൈറസ്‌ ബാധിച്ചിരിക്കാമെന്ന്‌ വിദഗ്‌ദ്ധര്‍ മുന്നറിയിപ്പ്‌ നല്‍കുന്നു. അതുകൊണ്ടുതന്നെ വിക്കിപീഡിയയില്‍ പരസ്യം ദൃശ്യമാകുന്ന കംപ്യൂട്ടറുകളില്‍ നല്ല ഒരു ആന്റി വൈറസ്‌ ഉപയോഗിച്ച്‌ സ്‌കാന്‍ ചെയ്യുകയും ആവശ്യമെങ്കില്‍ ബ്രൗസര്‍ ഒഴിവാക്കിയ ശേഷം റി-ഇന്‍സ്‌റ്റാള്‍ ചെയ്യുകയും വേണമെന്ന്‌ വിദഗ്‌ദ്ധര്‍ നിര്‍ദ്ദേശിക്കുന്നു.

41px ക്യാമറയുമായി നോകിയ 808 പ്യൂവര്‍വ്യൂ ഇന്ത്യയിലേക്ക്

ഒരു ഫോണിന്‌ 41 മെഗാപിക്‌സലുള്ള ക്യാമറയോ? ആരുമൊന്ന്‌ നെറ്റി ചുളിക്കും അല്ലേ.. എന്നാല്‍ സംഗതി യാഥാര്‍ത്ഥ്യമായിരിക്കുന്നു. സ്‌പെയിനിലെ ബാഴ്‌സലോണയില്‍ നടക്കുന്ന മൊബൈല്‍ വേള്‍ഡ്‌ കോണ്‍ഗ്രസിലാണ്‌ 41 മെഗാപിക്‌സല്‍ ക്യാമറയുള്ള നോകിയ 808 പ്യൂവര്‍വ്യൂ സ്‌മാര്‍ട്ട്‌ഫോണ്‍ അവതരിപ്പിച്ചത്‌. ഇപ്പോഴിതാ നോകിയ 808 പ്യൂവര്‍വ്യൂ ഇന്ത്യയിലേക്ക് ഉടന്‍ എത്തുമെന്നാണ് റിപ്പോര്‍ട്ട്.

ഏകദേശം 29999 രൂപയായിരിക്കും ഇതിനു ഇന്ത്യയില്‍ വില എന്നാണ് സൂചന. മൊബൈല്‍ ക്യാമറകള്‍ വികസിപ്പിക്കുന്നതില്‍ പ്രശസ്‌തമായ കാള്‍ സീസ്‌ എന്ന കമ്പനിയാണ്‌ നോകിയയ്‌ക്ക്‌ വേണ്ടി 41 എംപി ക്യാമറ തയ്യാറാക്കിയത്‌.

ഭാവിയില്‍ നോകിയയുടെ എല്ലാ ഫോണുകളിലും 41 എം പിയോ അതിന്‌ മുകളിലോ ഉള്ള ക്യാമറകളുണ്ടാകുമെന്ന്‌ നോകിയ വക്‌താവ്‌ അറിയിച്ചു. 41 എം പി ക്യാമറയാണുള്ളതെങ്കിലും ഉപയോക്‌താവിന്റെ താല്‍പര്യം അനുസരിച്ച്‌ രണ്ട്‌ എം പി, അഞ്ച്‌ എം പി, എട്ട്‌ എം പി, 16 എം പി എന്നിങ്ങനെ വ്യത്യസ്‌ത റെസൊല്യൂഷനോട്‌ കൂടിയ ചിത്രങ്ങളും നോകിയ 808 പ്യൂവര്‍വ്യൂ ഫോണ്‍ ഉപയോഗിച്ച്‌ എടുക്കാം. ഫോട്ടോ എടുക്കുന്നതിന്‌ പുറമെ ഉന്നത റെസൊല്യൂഷനോട്‌ കൂടിയ വീഡിയോയും ചിത്രീകരിക്കാന്‍ ഈ ഫോണിന്‌ സാധിക്കും.

കാര്യങ്ങള്‍ ഇതൊക്കെയാണെങ്കിലും ഓപ്പറേറ്റിംഗ്‌ സിസ്‌റ്റത്തിന്റെ കാര്യത്തില്‍ 808 പ്യൂവര്‍വ്യൂ ഫോണ്‍ ഒരു പോരായ്‌മയായി മാറിയേക്കാം. പുതിയ നോകിയ ഫോണുകളെല്ലാം വിന്‍ഡോസിന്റെ പുതിയ ഓപ്പറേറ്റിംഗ്‌ സിസ്‌റ്റത്തിലേക്ക്‌ മാറുന്ന ഇക്കാലത്ത്‌ പഴയ സിംബിയന്‍ ബെല്ലെ ഒ എസിലാണ്‌ നോകിയ 808ന്റെ വരവ്‌. ഇത്‌ പ്യൂവര്‍വ്യൂ ഫോണിന്റെ തിളക്കം കുറയ്‌ക്കുന്നു. പോറല്‍ വീഴാതിരിക്കാന്‍ ഗൊറില്ല ഗ്‌ളാസോട്‌ കൂടിയ നാല്‌ ഇഞ്ച്‌ അമോലെഡ്‌ ഡിസ്‌പ്‌ളേ, 1.3 ജിഗാഹെര്‍ട്‌സ്‌ പ്രോസസര്‍, 16 ജിബി ഓണ്‍സ്‌റ്റോര്‍ മെമ്മറി എന്നിവയാണ്‌ മറ്റ്‌ സവിശേഷതകള്‍.